ރާއްޖޭގެ ޞިއްޙީ ދާއިރާއަށް ބޭނުންވާ ބޭސް ލިބުން ހަރުދަނާކުރުމާ ގުޅޭ ގޮތުން ސްޓޭޓް ފާމާއިން ޔޫރަޕްގެ ބޮޑު ބޭސް އުފައްދާ ކުންފުނި އެސްޓްރަޒެނިކާގެ މަންދޫބުންނާ މިއަދު ބައްދަލުކޮށް މަޝްވަރާ ފަށައިފިއެވެ.
ސްޓޭޓް ފާމާއިން ބުނީ މި ބައްދަލުވުމުގައި މައިގަނޑު ގޮތެއްގައި އަލިއަޅުވައިލީ ރާއްޖެއަށް ޒަރޫރީ ބޭސް އިތުބާރާ އެކު ލިބޭނެ ނިޒާމެއް ޤާއިމުކުރުމާއި ދެ ފަރާތުން ދިގު މުއްދަތުގެ ގުޅުމެއް ބިނާކުރުމާ ބެހޭ ގޮތުން ކަމަށެވެ.
އޭގެ އިތުރުން ރާއްޖޭގެ ޞިއްޙީ ނިޒާމު ކުރިއެރުވުމުގައި އިސްކަންދޭންޖެހޭ ދާއިރާތަކާ ގުޅޭ ގޮތުން ވެސް ފުޅާ ދާއިރާއެއްގައި ވާހަކަ ދެކެވުނު ކަމަށް އެ ކުންފުނިން ބުނެފައިވެއެވެ.
ސްޓޭޓް ފާމާއިން ހާމަކޮށްފައިވާ ގޮތުގައި ދިވެހި ރައްޔިތުންނަށް ފެންވަރު ރަނގަޅު ބޭސް ފޯރުކޮށްދިނުމަކީ އެ ކުންފުނީގެ އެންމެ މުހިންމު އެއް ލަނޑުދަނޑިއެވެ.
އެ ލަނޑުދަނޑި ހާސިލުކުރުމަށް ދުނިޔޭގެ ނަން މަޝްހޫރު ފާމަސޫޓިކަލް ކުންފުނިތަކާ އެކު ގާތް ގުޅުން ބާއްވައި ޞިއްޙީ ދާއިރާ ހަރުދަނާކުރުމަށް މެދުކެނޑުމެއް ނެތި މަސައްކަތް ކުރަމުންދާ ކަމަށް ވެސް އެ ކުންފުނިން ބުނެފައިވެއެވެ.
އެސްޓްރަޒެނިކާއަކީ ބޭސް އުފެއްދުމުގެ ދާއިރާގައި ދުނިޔޭގެ ފެންވަރުގައި ފާހަގަކޮށްލެވޭ ބޮޑު ކުންފުންޏެކެވެ. މި ގުޅުމުގެ ސަބަބުން ރާއްޖެއަށް ބޭނުންވާ ބޭސް މެދުކެނޑުމެއް ނެތި ލިބުމަށް އިތުރު ބާރެއް ލިބިގެންދާނެ ކަމަށް ސްޓޭޓް ފާމާއިން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
