ގޭގެ ކޮންމެ ތަނަކަށް ބަލާލިނަމަވެސް ވީރާނާކަމާ ފަޅުކަމެވެ. ބާވެ ހަލާކުވަމުންދާ ކުޑަކުޑަ ގެއެކެވެ. ދުރުން ބަލާ މީހަކަށް ހީވާނީ އެއީ ފަޅަށް ހުންނަ ތަނެއް ހެންނެވެ. އެ ހާލަތުގައި ހުރި ތަނެއްގައި ރާއްޖޭގެ އާއިލާއެއް ދިރިއުޅެދާނެކަމަށް ދިވެހީންގެ ތެރެއިން ގިނަ މީހުން ގަބޫލު ވެސް ނުކޮށްފާނެއެވެ. ގޭގެ ފުރާޅުގައި ޖަހައިފައި ހުރީ ދަބަރަށް ވެފައި ހުރި ބާ ޓިނުތަކެކެވެ. އެޅި ގަލުން ރާނައިލައިފައި ހިޔާކޮށްލައިފައިވާކަން އެކަންޏެވެ. މިއީ ވެސް ދިވެހި އާއިލާއެއްގެ ހިތްދަތި ވާހަކައެވެ.

ދިވެހިން ދިރިއުޅޭ ގެތައް، ފަނުންނާއި، ލަކުޑިންނާއި ޓިނުން ހަދައިގެން އުޅުނު ޒަމާން ފާއިތުވެ ގޮސްފައިވާ ކަމަށް އަހަރެމެންގެ ތެރެއިން ގިނަ މީހުންނަށް ހީވެފައި އޮތް ނަމަވެސް، ރާއްޖޭގެ އެކިއެކި ރަށްތަކަށް ޒިޔާރަތް ކޮށްލައި، އެ ރަށްރަށުގެ މީހުން ގާތުގައި އަހައި، މީހުން ދިރިއުޅެމުންދާ ޙާލަތު ގާތުން ބަލާލުމުން ފެންނަ މަންޒަރު ތަފާތެވެ.