Advertisement

އެއަރޕޯޓުގައި ޖާސޫސުކުރަން އުޅުނު މައްސަލަ ދެފުށް ފެންނާނެހެން ތަހުގީގުކުރުމަށް ގޮވާލާ ހުށައެޅި މައްސަލަ ބޭރުކޮށްލައިފި!

19 Sep 2022 | 10:21
ސައީދު މަޖިލީހުގައި ވާހަކަ ދައްކަވަނީ/ ފޮޓޯ: މަޖިލިސް

ވެލާނާ އިންޓަރނޭޝަނަލް އެއަރޕޯޓުގައި ޖާސޫސުކުރަން އުޅުނު މައްސަލަ ދެފުށް ފެންނާނެެހެން ތަހުގީގުކޮށް، އެއަރޕޯޓުގެ ސަލާމަތީ ކަންކަން އިތުރަށް ވަރުގަދަކުރުމަށް ސަރުކާރަށް ގޮވާލާ މަޖިލީހަށް ހުށައެޅި ކުއްލި މައްސަލަ ބޭރުކޮށްލައިފިއެވެ. 

ކުއްލި މައްސަލަ މަޖިލީހަށް ހުށައެޅުއްވީ ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދެވެ. 

ބަޓަން ކެމެރާ ބޭނުންކޮށްގެން އެއަރޕޯޓުގައި ޖާސޫސުކުރަމުން ދިޔަ އިންޑިއާގެ ދެމީހަކު ވަނީ މިދިޔަ މަހުގެ 28 ގައި ފުލުހުންގެ ބެލުމުގެ ދަށަށް ގެންގޮސްފައެވެ. 

Advertisement

ސައީދު މަޖިލީހަށް ކުއްލި މައްސަލައެއް ހުށައަޅުއްވާފައިވަނީ އެ މައްސަލަ ތަހުގީގުކުރުމުގައި އޮޅުވާލުންތައް އޮޅުވާލަމުންދާކަމަށް ތުހުމަތުކުރައްވަމުންނެވެ. 

ސައީދު ވިދާޅުވީ އެ މައްސަލަ ހުށައެޅުއްވީ އެއަރޕޯޓުގެ ސަލާމަތަށް ނުރައްކާވާފަދަ ހާދިސާއެއް ހިނގާފައިވާއިރު ބައިނަލްއަގުވާމީ މީޑިއާތަކުން އެ ހާދިސާއާއި ގުޅޭގޮތުން ކަންބޮޑުވާފަދަ ބިރުވެރި ވާހަކަތަކެއް ޝާއިއުކޮށްފައި ވާތީއާއި އެ މައުލޫމާތުތަކަށް ބަލާއިރު އެ ހާދިސާ ހިނގުމުގެ ކުރިން ރާއްޖޭގައި އެކަމުގެ ބައިވެރިން ބައްދަލުވުމެއް ބާއްވާފައިވާ ކަމަށާއި، އެ ހާދިސާ ހިނގުމަށްފަހު އިންޑިއާ ސަރުކާރުގެ އޮފިޝަލަކު ރާއްޖެއައިސް ހައްޔަރުކޮށްފައިވާ ދެމީހުން ދޫކޮށްލުމަށް އެދިފައިވާކަމަށާއި އަދި މި ބައްދަލުވުމަށްފަހު ފުލުހުން އެ ހާދިސާގެ އަސްލު ރިޕޯޓުގެ ބަދަލުގައި އެހެން ރިޕޯޓެއް ނެރެފައިވާތީ އަދި އެއީ ރޭވިގެން ހިންގާފައިވާ ނުރައްކާތެރި އަމަލެއްކަމަށާއި، އެކަމުގެ ނުރައްކާތެރިކަން އަވައްޓެރި ގައުމުތަކަށް ވެސް އޮތުމުން، އެ މައްސަލަ ޚާއްސަ މައްސަލައެއްގެ ގޮތުގައި ބެލުމަކީ މުހިންމުކަމެއްކަމަށް ދެކެވަޑައިގަންނަވާތީކަމަށެވެ. 

ސައީދު ހުށައެޅުއްވި މައްސަލައިގައި ވަނީ އެ މައްސަލަ ދެފުށް ފެންނާނެހެން ތަހުގީގުކުރުމަށްފަހު އެ މައުލޫމާތު މަޖިލީހާއި ހިއްސާކުރުމަށް ގޮވާލާފައެވެ. އަދި ގައުމީ ސަލާމަތަށް ނުރައްކާވާ ފަދަ މިފަދަ މައްސަލައެއްގައި ފުލުހުން އެކަށީގެންވާ ފިޔަވަޅު އަޅާފައިނުވާތީ އެކަމުގެ ކަންބޮޑުވުންވެސް ފާޅުކޮށްފަ އެވެ.

މި މައްސަލަ މަޖިލީހަށް ބަލައިގަތުމާމެދު ނެގި ވޯޓުގައި 34 މެންބަރުން ވަނީ ބަލައިގަންނަން ނުފެންނަ ކަމަށް ވޯޓު ދެއްވާފަ އެވެ. މައްސަލައާ އެއްކޮޅަށް ވޯޓު ދެއްވީ އެންމެ ހަ މެންބަރުންނެވެ.

އެއާއެކު އެ މައްސަލަ ވަނީ މަޖިލީހުން ބޭރުކޮށްލާފައެވެ. 

Advertisement

ކޮމެންޓް