މި ވެރިކަމުގެ ދައުރު ނިމޭއިރު، މަސްވެރިން ބާނާ މަސް ކަނޑަން އަޅަން ނުޖެހޭ ވަރަށް އެ ސިނާއަތު ފުޅާކުރާނެކަމަށް ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެމްބަރު އަހުމަދު އީސާ ވިދާޅުވެއްޖެއެވެ. 

އީސަ މިފަދައިން ވިދާޅުވެފައިވަނީ މަސްވެރިކަން ތިޔާގިވެފައި ވީ ނަމަވެސް، ބާނާ މަސްކޮޅު ނުކެރި ކަނޑަށް އަޅަން ޖެހިފައިވާކަން ފާހަގަކުރައްވާ ރައްޔިތުންގެ މަޖިލީހުގެ މާވަށު ދާއިރާގެ މެމްބަރު އަދި ކުރީގެ އިކޮނޮމިކް މިނިސްޓަރު މުހައްމަދު ސައީދު މަޖިލީހުގައި ދެއްކެވި ވާހަކަތަކަށް ރައްދުދެއްވަމުންނެވެ. 

ސައީދު ވިދާޅުވީ، މަސްވެރިންނަށް ވީ ވައުދު ފުއްދުމުގައި ސަރުކާރު ފެއުލުވެފައިވާކަމަށެވެ. އަދި މިއަދު ބާނާ މަސްކޮޅަށް ހަމަ އަގު ނުލިބޭ ތާގައި ކިރޭނެ ގޮތެއް ނެތިގެން މަސްވެރިންނަށް ބާނާ މަސްކޮޅު ކަނޑަށް އަޅަން މަޖުބޫރުވެފައިވާކަމަށެވެ. 

ސައީދުގެ ވާހަކަތަކަށް އީސަ ވަނީ ރައްދުދެއްވާފައެވެ. 

އެގޮތުން އޭނާ ވިދާޅުވީ، ސައީދު އިކޮނޮމިކް މިނިސްޓަރުގެ މަގާމުގައި ހުންނެވި އިރުވެސް މަސްވެރިން ކަނޑަށް މަސް އަޅަމުން ދިޔަކަމަށެވެ. ރައީސް ޔާމީންގެ ދައުރު ނިމުނު އިރުވެސް މަސްވެރިންނަށް އެއްވެސް ކަމެއް ކޮށްދެވިފައި ނުވާއިރު، މިއަދު މަސްވެރިން މަސްކަނޑަށް އަޅާ ވާހަކަދެއްކުމަކީ ލަދުވެތި ކަމެއްކަމަށް އީސަ ވިދާޅުވިއެވެ.

އަދި އެއާއި ގުޅުވާ ވިދާޅުވީ މި ސަރުކާރު ނިމެންވާއިރަށް އެ މައްސަލައަށް ހައްލު ހޯއްދަވާދެއްވާނެކަމުގެ ޔަގީންކަން ދެއްވާކަމަށެވެ. 

އީސަ އިތުރަށް ވިދާޅުވީ ރައީސް ޔާމީންގެ ސަރުކާރު ނިމުނު އިރު މަސްވެރިން ކިރި މަހަށް ނުދައްކާ 40 މިލިއަން ރުފިޔާ އޮތްކަމަށެވެ. އަދި އެ ފައިސާ މަސްވެރިންނަށް ދިނީ މި ސަރުކާރުންކަމަށް އީސަ ވިދާޅުވިއެވެ. 

އެވާހަކައާއި ގުޅުވާ އީސާ ވިދާޅުވީ މަސްވެރިން ބާނާ މަހަށް ފައިސާ ނުދީ ބިލު ކަރުދާސްކޮޅު ދޭ ބަޔަކަށް މި ސަރުކާރު ނުވާނެކަމަށެވެ. މަސްވެރިންނަށް ދިމާވެފައިވާ މައްސަލަތައްވެސް މި ދައުރު ނިމެންވާއިރަށް ހައްލުކޯށްދެއްވާނެކަމަށް އީސަ ވަނީ ތަކުރާރުކޮށް ވިދާޅުވެފައެވެ. 

މަސްވެރިކަން ރާއްޖޭގައި ތިޔާގިވެފައިވާއިރު، މަސްވެރިން ބާނާ މަސް ނުކިރޭކަމުގެ ޝަކުވާތައް އުތުރާއި ދެކުނުގެ މަސްވެރިް ދަނީ ކުރަމުންނެވެ. 

މަސްކިރާ ތަންތަނުގައި ކިއުގައި ޖެހިގެން ގިނަ އިރު އޮންނަން ޖެހޭއިރު، ފަސް ފިނިކުރާނެ އައިސް އެކަށީގެންވާ މިންވަރަށް ނުލިބޭކަމުގެ ޝަކުވާތައްވެސް މަސްވެރިން ދަނީ ކުރަމުންނެވެ. އަދި އައިސް ނުލިބުމުގެ ސަބަބުން މަސްތައް ނުކިރި ހަލާކުވުމާއި ގުޅިގެން 20 ޓަނު 30 ޓަނުން ކަނޑަށް އުކާލަމުންދާކަންވެސް މަސްވެރިން ފާހަގަކުރައްވައެވެ.