ރައްޔިތުންގެ މަޖިލީހުގައި 90 އަށްވުރެ ގިނަ ދާއިރާތައް އޮތް އިރު، އާއްމުކޮށް ތަރައްގީ އާއި ކުރިއެރުން އަންނަތަން ފެންނަނީ ދާއިރާގެ ރަށްތަކުގެ ތެެރެއިން އާބާދީގެ ގޮތުން ބޮޑު، ރަށްތަކަށެވެ. އާބާދީ ކުދި ރަށް ރަށަށް އޮންނަނީ އަޅާ ނުލެވިފައެވެ. މިއީ އަބަދުވެސް، ހުރިހާ ދާއިރާއެއްގައި ހެން ކަން ވަމުން އަންނަ ގޮތް ކަމީ އެންމެންވެސް ގަބޫލު ކުރާނެ ހަގީގަތެވެ. އެ ތަފާތު ކުރުންތަކުގެ ސަބަބުން އާބާދީގެ ގޮތުން ކުދި ރަށްރަށުގެ ރައްޔިތުން ތިބެނީ މާޔޫސްވެ އުއްމީދު ކަނޑާލައިގެންނެވެ. ތަރައްގީ އަކީ އެ ރަށްތަކަށް އަންނާނެ އެއްޗެއް ކަމަށް މީހަކު ބުނި ނަމަވެސް އެއީ ކުލައެއް ނުޖެހޭނެ ހުވަފެނެއްކަން އެ ރައްޔިތުންގެ ހިތާއި ހިތުން ތިބެނީ ކިޔާލަ ކިޔާލައެވެ.

ރާއްޖޭގައި މިހާތަނަށް ފެންނަމުން އަންނަ އިންތިޚާބީ ފިލޯސަފީއަށްބަލާއިރު ރައްޔިތުންގެ މަޖިލީހާއި ލޯކަލް ކައުންސިލް އިންތިޚާބުގައި އަބަދުވެސް ރައްޔިތުން ވޯޓްލަނީ އެވަގުތަކު ސަރުކާރު ހިންގަން އޮންނަ ޕާޓީއަކަށް ކަމުގައި އޮންނަނީ ގަބޫލުކުރެވިފައެވެ. އެމްޑީޕީން 2008 ވަނަ އަހަރާއި އަދި 2018 ވަނަ އަހަރު ބޭއްވި ރިޔާސީ އިންތިޚާބު ކާމިޔާބު ކުރުމަށްފަހު ދައުވާކުރީ ދިވެހި ރައްޔިތުންނަށް އެންމެ ފައިދާ ބޮޑީ ސަރުކާރަށް ތާއީދު ކުރުމުން ކަމުގައެވެ.