މެޓް އޮފީހުން އައްޑޫއާއި ފުވައްމުލަކު ސިޓީއަށް ކުރިން އޮރެންޖު އެލާޓް ނެރެފައިވަނީ މިރޭ 7 ޖެހުމާ ހަމައަށެވެ. ނަމަވެސް މިހާރު އެލާޓްގެ ވަގުތު ވަނީ މިރޭ 11 އާއި ހަމައަށް އިތުރުކޮށްފަ އެވެ. މެޓް އޮފީހުން ހާމަކޮށްފައިވާ ގޮތުގައި، މި ސިޓީތަކަށް ގަޑިއަކު 34 މޭލާއި 40 މޭލާއި ދެމެދުގެ ބާރުމިނުގައި ވައި ޖެހި، ވިލާގަނޑުގައި ގަޑިއަކު 60 މޭލަށް ވައިގަދަވެ ކަނޑުތައް ވަރަށް ގަދަވާނެ ކަމަށް ލަފާ ކުރެވެއެވެ.

އިންޑިއާގެ ތިން މީހަކަށް އިމިގްރޭޝަނަށް ހާޒިރުވާން އަންގައިފި އެވެ. މިއަދު އިމިގްރޭޝަނުން ފޮޓޯ ޢާންމުކޮށް، އެ އިދާރާއަށް ހާޒިރުވާން އަންގާފައިވަނީ، ރޯހިތް ކުމާރު (33އ) އާއި ގުރުޖަންތް ސިންގް (24އ) އަދި ޝަމްޝޭން އަލަމް (35އ) އަށެވެ.

މިއަދު ޒަކާތު ހައުސްއިން ނެރުއްވި އިޢުލާނެއްގައި ބުނެފައިވަނީ މާލެސިޓީ (މާލެ، ހުޅުމާލެ، އަދި ވިލިމާލެ) އިން އަލަށް ފަޤީރުންނާއި މިސްކީނުންގެ ދަފުތަރުގައި ރަޖިސްޓްރީވާން ބޭނުންވާ ފަރާތްތަކަށް އެފުރުސަތު ހުޅުވާލުމަށް ނިންމާފައިވާކަމަށެވެ. ދަފްތަރުގައި ރަޖިސްޓްރީވެލައްވަން ބޭނުންވާ ފަރާތްތަކުން, އަންނަ އާދިއްތަ ދުވަހުން ފެށިގެން ރަސްމީ ބަންދު ނޫން ކޮންމެ ދުވަހެއްގެ ހެނދުނު 9:30 އިން މެންދުރުފަހު 12:00 ގެ ނިޔަލަށް ފޯމު ހުށަހެޅުއްވުމަށް ޒަކާތު ހައުސްއިން ވަނި އެދިލައްވާފައެވެ.

މިއަދު ފިނޭންސް މިނިސްޓްރީއިން ހާމަކުރެއްވި ގޮތުގައި، ސަޢުދީ ފަންޑް ފޯ ޑިވެލޮޕްމަންޓާއެކު މިއަދު ވެވުނު އެއްބަސްވުމުގެ ދަށުން ރާއްޖޭގެ ސިއްހީ ދާއިރާ ތަރައްގީ ކުރުމަށް އެ ފަންޑުން 50 މިލިއަން ޑޮލަރު ފޯރުކޮށްދޭން ވަނީ ހަމަޖެހިފައެވެ. އަދި މި ލޯނުގެ އެހީގައި ރާއްޖޭގައި 150 އެނދުގެ 3 ހޮސްޕިޓަލެއް އިމާރާތް ކުރުމަށް ވަނީ ނިންމާފައެވެ.

މިއަދު ރައީސް އޮފީހުން ހާމަ ކުރެއްވި ގޮތުގައި ދިވެހިރާއްޖޭގެ ބިމާ ބެހޭ ޤާނޫނަށް 9 ވަނަ އިޞްލާޙު ގެނައުމުގެ ބިލު ތަޞްދީޤު ނުކުރައްވާ، ޤާނޫނުއަސާސީގެ 91 ވަނަ މާއްދާގެ (ހ) ގައި ބަޔާންކޮށްފައިވާ ގޮތުގެ މަތިން ރައްޔިތުންގެ މަޖިލީހުގައި އެދިވަޑައިގެން، އަލުން ވިސްނާ ވަޑައިގަތުން އެދި، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ވަނީ އެ ބިލު އަލުން އަނބުރާ ރައްޔިތުންގެ މަޖިލީހަށް ފޮނުއްވަވައިފައެވެ.

ފުލުހުން މިއަދު މައުލޫމާތު ދެއްވި ގޮތުގައި، ފުލުހުންނާއި، ޔޫ.އެން.އޯ.ޑީ.ސީ ގުޅިގެން ”ޓްރެއިނިންގ އޮން ސްޓެންތެންގ ކެޕޭބިލިޓީސް ޓު ޑިސްޓްރަޕްޓް މެރިޓައިމް ކްރައިމްސް އޭޒް ރިލޭޓެޑް ޓު ޓެރަރިސްޓް ތްރެޓްސް” ގެ ނަމުގައި ވަނީ ޕްރޮގްރާމެއް ކުރިއަށް ގެންގޮސްފައެވެ. މި ތަމްރީނު ޕްރޮގްރާމުގައި، ދިވެހި ފުލުހުންގެ ޚިދުމަތުގެ އެކި ބަހާތަކުން 22 މުވައްޒަފުން ވަނީ ބައިވެރިވެފައެވެ.

ޢުމްރާ ދަތުރުފުޅު ނިންމަވާލެއްވުމަށް ފަހު ރައީސްގެ ދެކަނބަލުން ރާއްޖެ ވަޑައިގެންފިއެވެ. ރައީސް ޑރ.މުޢިއްޒު މި ޢުމްރާ ދަތުރުފުޅަށް ފުރާވަޑަިއގެންނެވީ މި މަހުގެ 10 ވަނަ ދުވަހުއެވެ.

ދިވެހިރާއްޖެއިން އޮލިމްޕިކްސްއަށް ކޮލިފައިވި ފުރަތަމަ އެތުލީޓު، ޓޭބަލް ޓެނިސްގެ ތަރި، ފާތިމަތު ދީމާއަށް ރައީސުލް ޖުމްހޫރިއްޔާ ޑރ.މުޙައްމަދު މުޢިއްޒު ތަހުނިޔާ ވިދާޅުވެއްޖެއެވެ. ރައީސް ޑރ. މުޙައްމަދު މުޢިއްޒު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، މިއީ ދިވެހި ކުޅިވަރުގެ ތާރީޚީ ވަގުތެއް ކަމަށެވެ. އަދި ދީމާގެ އެ ފުރިހަމަ ކާމިޔާބީއަށް މަރުުހަބާ ވިދާޅުވެ ދީމާ މުޅި ދިވެހިރާއްޖެވެސް ފަޚުރުވެރިކުރުވައިފި ކަމަށް ރައީސް ޑރ.މުޢިއްޒު ވިދާޅުވިއެވެ. މީގެ އިތުރުން ރައީސް ޑރ.މުޢިއްޒު ވަނީ، އޮލިމްޕިކްސްގައި ދީމާއަށް ކާމިޔާބީއަށް އެދޭކަމަށްވެސް ވިދާޅުވެފައެވެ.

ރާއްޖެއާއި އިނގިރޭސިވިލާތާ ދެމެދު ވިޔަފާރީގެ ގުޅުންތައް ވަރުގަދަ ކުރުމަށް ދެ ޤައުމުގެ ވަޒީރުން މަޝްވަރާކުރައްވައިފިއެވެ.

ބައެއް ޓެކްސީ އެޕްތަކުން އަމިއްލައަށް އަގު ކަނޑަައަޅާކަމަށާއި، މި މައްސަލަ ބަލާނެ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރުގެ ނައިބު ޢަލީ ނިޝާން ވިދާޅުވެއްޖެއެވެ. ދައުލަތުގެ މީޑިޔާ ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުން ދަތުރުފަތުރާއި މަދަނީ އުދުހުންތަކާ ބެހޭ ވަޒީރުގެ ނައިބު ޢަލީ ނިޝާން ވިދާޅުވީ، ޓެކްސީ އެޕްތައް ހިންގާ ފަރާތްތައް ހޯދާ އެ ފަރާތްތަކާ ގުޅިގެން، ޓެކްސީ ކުރަނީ މިނިސްޓްރީއިން ކަނޑައަޅާފައިވާ އަގުތަކުގައިތޯ ބަލާނެ ކަމަށެވެ.

މިއަދު މެންދުރު ފަހު ކުރިއަށް ދިޔަ، ކޮލިފިކޭޝަނުގެ ފައިނަލުން، ދީމާ، 1-4 ސެޓުން މެޗު ކާމިޔާބުކޮށް، އޮލިމްޕިކްސް ގައި ވާދަކުރަން ހޮވުނު އިރު މިއީ ދިވެހި ތާރީޚުގައި ވެސް ދިވެހި އެތުލީޓަކު އޮލިމްޕިކްސް އަށް ކޮލިފައިވި ފުރަތަމަ ފަހަރުކަން ފާހަގަ ކޮށްލެވެއެވެ. ދީމާގެ މި ކާމިޔާބީ ފާހަގަ ކުރުމުގެ ގޮތުން، ރާއްޖޭގެ ގިނަ އިސްވެރިންތަކެއް ވަނީ ދީމާއަށް މަރުޙަބާ ކިޔާފައެވެ. އެގޮތުން، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒާއި ނައިބު ރައީސް ހުސައިން މުޙައްމަދު ލަޠީފު ވެސް ވަނީ ދީމާއަށް ތަހުނިޔާ ވިދާޅުވެފައެވެ.

މޫސުން ގޯސްވުމުގެ ސަބަބުން ލިބިދާނެ ގެއްލުމަކަށް ރައްކާތެރިވުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން އިލްތިމާސްކޮށްފިއެވެ. އެގޮތުން ޢާންމު ރައްޔިތުންގެ މުދަލާއި ގެދޮރަށް ލިބިދާނެ ގެއްލުމަކުން ރައްކާތެރިވުމަށް ދުރާލާ މަސައްކަތް ކުރުމަށް އެ އޮތޯރިޓީން ވަނީ އިލްތިމާސްކޮށް، ރައްކާތެރިވުމުގެ ގޮތުން އެޅިދާނެ ބައެއް ފިޔަވަޅުތައް ބަޔާންކޮށްފައެވެ.

މިއަދު ސުޕްރީމް ކޯޓުން ކުރި ޙުކުމްގައިވަނީ ގުޅިފަޅު ހިއްކުން ހުއްޓާލުމަށް ހައިކޯޓުން ވަގުތީ ޢަމުރު ނެރެފައިވަނީ، ސުޕްރީމު ކޯޓުން ކަނޑައަޅާފައިވާ އުސޫލުތަކާ ޚިލާފަށް ކަމަށްވާތީ، މައްސަލަ ބެލި ފަނޑިޔާރުންގެ އިއްތިފާޤުން ހައިކޯޓުގެ އަމުރު، ބާތިލުކުރާ ކަމަށެވެ.

ސިނަމާލެ ބްރިޖު މަތީ ހިނގި މި އެކްސިޑެންޓާ ގުޅިގެން ފުލުހުން ވިދާޅުވީ، މި އެކްސިޑެންޓް ހިނގާފައި ވަނީ މީގެ ކުޑަ އިރުކޮޅެއް ކުރިން ކަމަށާއި މިހާޜު އެ ސަރަހައްދުގައި ފުލުހުން ހަރަކާތްތެރިވަމުން ދާ ކަމަށެވެ. ފުލުހުން މައުލޫމާތު ދެއްވިގޮތުގައި، އެކްސިޑެންޓުގައި އަނިޔާ ވަނީ ފިރިހެނަކަށާއި ކުޑަކުއްޖަކަށް އަނިޔާވެފައެވެ. އެކްސިޑެންޓުގައި ޒަޚަމްވި ފަރާޓްތައް ހޮސްޕިޓަލަށް ގޮސް ފަރުވާދެމުން ދާކަމަށް ފުލުހުން ވިދާޅުވިއެވެ.

މި މަހުގެ 27 އިން 29 އަށް ޗައިނާގެ ޝަންހާއީގައި ބާއްވާ އައިޓީބީ ޗައިނާ 2024 ގެ އޮފިޝަލް ޕާޓްނަރ މަންޒިލުގެ ގޮތުގައި ދިވެހިރާއްޖެ ކަނޑައެޅިކަން އައިޓީބީ ޗައިނާއިން އިއުލާންކޮށްފައިވަނީ މިއަދުގެ ވަގުތެއްގައެވެ. މި ޝޯގެ ތެރެއިން އެމްއެމްޕީއާރުސީއިން، ދިވެހިރާއްޖޭގެ ފަތުރުވެރިކަން އިސްތިހާރުކުރުމަށްތަފާތު އެކިއެކި ހަރަކާތްތަކެއް ބާއްވަން ވަނީ ހަމަޖެހިފައެވެ. އެގޮތުން އައިޓީބީ ޗައިނާގައި ބައިވެރިވާ ހުރިހާ ފަރާތްތަކަށް ވެސް ދިވެހިރާއްޖޭގެ ޘަޤާފަތާއި ތަރިކަ ތަޖުރިބާ ކޮށްލުމުގެ ފުރުސަތު ފޯރުކޮށްދެވޭނެއެވެ.

ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން މިއަދު ކުރި އިޢުލާނެއްގައިވަނީ، ގްރޭޓަރ މާލެ ސަރަހައްދުގައި ހަތަރު ފުރޮޅުލީ އުޅަނދުގައި ޓެކްސީ ކުރުމުގެ އަގުތަކަށް ބަދަލު ގެންނަކަމަށާއި، ބަދަލު ގނެސްފައިވާ އަގުތަކަށް 20 މޭ 2024 ވާ ހޯމަ ދުވަހުން ފެށިގެން ޢަމަލުކު ރަންޖެހޭނެ ކަމަށެވެ.

މިއަދު އެޗްޑީސީއިން ނެރުނު ބަޔާނެއްގައި ބުނެފައި ވަނީ ހުޅުމާލޭގެ 2 ވަނަ ފިޔަވީގެ ރުއްގަނޑު 3 ގެ ބީޗް ސަރަހައްދުގައި އަމިއްލަ ފަރާތްތަކުން ހަދާފައިވާ ހަޓްތަކާއި އެތާނގައި ބަހައްޓާފައިވާ ތަކެތި ނަގަން އަންގާކަމަށެވެ. އެގޮތުން ހަޓްތަކާއި އެހެނިހެންވެސް ތަކެތި ނަގަން އެޗްޑީސީއިން ދީފައިވަ ސުންގަޑިއަކަށް ދީފައިވަނީ މިމަހުގެ 30 ވަނަ ދުވަހެވެ.

މިއަދު ސްޓެލްކޯއިން ހާމަކުރެއްވި ގޮތުގައި އަދ. ފެންފުށްޓަށް ދިމާވެފައިވާ ކަރަންޓުގެ މައްސަލަ ޙައްލުކުރުމަށް، އިންޖީނުގޭގެ ޕެނަލް ބޯޑު އަޕްގްރޭޑްކޮށް މިހާރު ވަނީ ބޭނުން ކުރަންފަށާފައެވެ. އަދި، މިއާއެކު، ފެންފުށީގައި ސްޓެލްކޯއިން ދެމުންގެންދާ ޚިދުމަތުގެ ފެންވަރު އިތުރަށް ރަނގަޅުކުރެވި، އެކަމުގެ ފަސޭހަތައް ފެންފުށީ ރައްޔިތުންނަށް ލިބެމުން ދާ ކަމަށްވެސް ސްޓެލްކޯއިން ބުނެއެވެ.

1445 ވަނަ އަހަރުގެ ޙައްޖުގެ ތައްޔާރީތަކާ ބެހޭގޮތުން ވާހަކަފުޅު ދައްކަވަމުުން ޝަކީލް ވިދާޅުވީ ޢުމުރުން ދުވަސްވެ ގައިބާރު ދެރަވުމުން ޙައްޖަށް ދާން މަޑުނުކޮށް، ޒުވާން ޢުމުރުގައި ވީހާވެސް އަވަހަކަށް ޙައްޖަށް ދާން ކިއު އަށް އެރުމަށް އިލްތިމާސް ކުރައްވާ ކަމަށެވެ. ވަރަށް ގިނަ ބޭފުޅުން، ކިއު ދިގުވީމާ، ކިއުއަށް އަރަން ފަސްޖެހޭކަން ފާަހަގަކުރައްވާ ޝަކީލް ވިދާޅުވީ، ކިއުއަށް އެރުއްވުމުން ޖާގަ ކަށަވަރު ވީ ކަމަށާއި، ކިއުއަށް ނާރާ މަޑުކުރައްވާނަމަ، ކިއު ދާނީ ދިގުވަމުން ކަމަށެވެ. އެހެންކަމުން، ކިއު ދިގުވާތީ، ކިއުއަށް ނާރާ މަޑުނުކުރެއްވުމަށް ޝަކީލް އިލްތިމާޒު ކުރެއްވިއެވެ.

ތަޢުލީމީ ވުޒާރާއިން މިއަދު އެކްސްގައިކުރެއްވި ޕޯސްޓެއްގައި ވިދާޅުވީ ކުރިއަށް މިއޮތް ދެ އަހަރުގެ ތެރޭގައި ސަރުކާރުގެ ހުރިހާ ސްކޫލެއް އޭސީ ކުރުމަށް ހަމަޖެހިފައިވާކަމަށެވެ. ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވީ އިރާދަކުރެއްވިއްޔާ، 2 އަހަރު ތެރޭގައި ކޮމިއުނިޓީގެ އެހީތެރިކަމާއެކު ސަރުކާރުގެ ހުރިހާ ސްކޫލެއް އޭސީކޮށް ނިންމާނެ ކަމަށެވެ. ސަރުކާރު ސްކޫލުތަކުގެ ކްލާސްރޫމްތައް އެއަރ ކޮންޑިޝަންކޮށް މި ފެށޭ ދިރާސީ އައު އަހަރުން ފެށިގެން ސޯލާ ޕަވަރ ބޭނުންކުރެވޭ އިޢާދަކުރުވަނިވި ހަކަތައިގެ މަޝްރޫޢުތަކެއް ސްކޫލުތަކުގައި ފެށުމަށް ގަސްދުކުރައްވާކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ މިދިޔަ މާޗް މަހުގެ 6 ވަނަ ދުވަހުއެވެ.

އިންޑޮނީޝިއާގެ ޖަޒީރާ ޕްރޮވިންސެއް ކަމަށްވާ ހުޅަނގު ސުމަޓްރާއަށް މިދިޔަ ހަފުތާ ބަންދުގައި ބޯކޮށް ވާރޭ ވެހި، ފެންބޮޑުވުމުގެ ސަބަބުން 37 މީހުން މަރުވެފައިވާ ކަމަށް އޮފިޝަލުން ބުނެފިއެވެ. ހޮނިހިރު ދުވަހު ކުރި ވިއްސާރައިގައި ހުޅަނގު ސުމަޓްރާގައި ފެންބޮޑުވެފައިވާއިރު، ކިސަޑުފޭބުމާއި ބިންގަނޑު ކަނޑައިގެން ދިއުމުގެ ސަބަބުން ހަތަރު ޑިސްޓްރިކްޓަކަށް އަސަރުކޮށްފައިވާކަމަށް ކަމަށް އިންޑޮނޭޝިއާގެ ނޭޝަނަލް އެޖެންސީ ފޯ ޑިޒާސްޓާ ކައުންޓާމޭސަރ އިން ނެރުނު ބަޔާނެއްގައި ބުނެފައިވެއެވެ. އެގޮތުން އަސަރުކޮށްފައިވަނީ އަގަމް، ތަނާހް ދަތާރު، ޕަޑަންގް ޕަންޖަންގް އަދި ޕަޑަންގް ޕަރިއާމަން އަށެވެ.

ހައުސިން ޑިވެލޮޕްމަންޓް ކޯޕަރޭޝްން (އެޗްޑީސީ) އިން މިއަދު އަންގާފައިވަނީ ހުޅުމާލޭގެ ފުރަތަމަ ފިޔަވަހީގެ ސިނާއީ ސަރަހައްދުގެ ދުވާރުމަތީގައި ހައުސިން އެ ކޯޕަރޭޝަނުގެ ހުއްދަ ނެތި ބަހައްޓާފައިތަކެތި ނެގުމަށެވެ. އެގޮތުން ހުޅުމާލޭ ފުރަތަމަ ފިޔަވަހީގެ ސިނާއީ ސަރަހައްދުގެ ދުވާރު މަތީގައި، ޤަވާއިދާ ޚިލާފަށް ބަހައްޓާފައި ހުރި އެއްޗެހި 30 ދުވަސް ތެރޭގައި ނެގުމަށް އެޗްޑީސީއިން ވަނީ އަންގާފައެވެ. މީގެ އިތުރުން ހުޅުމާލޭ ދެވަނަ ފިޔަވައްސާއި ތިންވަނަ ފިޔަވަހީގެ ހުސް ބިންތަކުގައިވެސް ގަވާއިދާ ހިލާފަށް ބަހައްޓާފައިވާ ތަކެތި ނަގަން އެ ކޯޕަރޭޝަނުން ވަނީ އަންގާފައެވެ.

އިނގިރޭސިވިލާތުގެ މިނިސްޓަރ އޮފް ސްޓޭޓް ފޯ ދަ އިންޑޯ ޕެސިފިކް، އޭން މެރީ ޓްރެވެލިއަން ދިވެހިރާއްޖެއަށް ކުރެއްވި ރަސްމީ ދަތުރުފުޅު ނިންމަވާލައްވައިފިއެވެ. ދިވެހިރާއްޖެއަށް ކުރެއްވި ދަތުރުފުޅު ނިންމަވާލެއްވިކަން ހާމަ ކުރައްވާ ވަޒީރު ޓްރެވެލިއަން އެކްސްގައި ކުރެއްވި ޕޯސްޓެއްގަިއ ވިދާޅުވީ، މި ދަތުރުފުޅަކީ ވަރަށް އުފެއްދުންތެރި، ދަތުރުފުޅެއް ކަމަށާއި، ދިވެހިރާއްޖެއާއި އިނގިރޭސިވިލާތާ ދެމެދު ގުޅުން ބަދަހި ކުރުމަށް މަޝްވަރާކުރެއްވި ކަމަށެވެ.

މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހާމަ ކުރެއްވި ގޮތުގައި ސްރީލަންކާގެ އަސްކަރިއްޔާ އާ ގުޅިގެން އެމްއެންޑިއެފުން ހިންގި ބޭސިކް އީއޯޑީ ކޯސް ނިންމާލާ، މިއަދު ވަނީ އެމްއެންޑީއެފް ގެ އެމްއެންޑީއެފް ސަދަން އޭރިއާ ކޮމާންޑް، ހެޑްކުއޯޓަރޒްގައި ރަސްމިއްޔާތެއް ބާއްވާފއެވެ. އެމްއެންޑީއެފް ގެ ސަދަން އޭރިއާ ކޮމާންޑުގައި ކުރިއަށް ގެންދިޔަ މި ކޯސް ކުރިއަށް ގެންގޮސްފައިވަނީ މި އަހަރުގެ މާރިޗު 24 އިން ފެށިގެން މޭ 11 ގެ ނިޔަލަށެވެ. އެމްއެންޑީއެފުން ހާމަކުރެއްވިގޮތުގައި މި ކޯހުން 27 ސިފައިން ވަނީ ދަސްވެނިވެފައެވެ.

ޢިއްޒުއްދީން ފާލަން ތަރައްޤީ ކުރުމުގެ ޢަމަލީ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމް.ޓީ.ސީ.ސީން ފަށައިފިއެވެ. ޢިއްޒުއްދީން ފާލަން މަރާމާތުކުރުމުގެ މަސައްކަތް ފަށާފައިވަނީ، އެ ފާލަން މަރާމާތު ނުކޮށް ގިނަ ދުވަސްތަކެއްވެ، ފާލަން ވަރަށް ބޮޑަށް ވީރާނާވެފައިވާތީއެވެ. އެހެންކަމުން، މިހާރު ހުރި ފާލަން ރޫޅާލުމަށްފަހު އަލުން އެތަން ތަރައްޤީކުރުމަށް ފާލަން ވަނީ މިހާރު ބަންދުކޮށްފައެވެ.

އިލެކްޝަންސް ކޮމިޝަން (އީސީ) އިން މިއަދު އިޢުލާންކުރެއްވި ގޮތުގައި، ޖޫން މަހުގެ 8 ވަނަ ދުވަހު ބާއްވަން ހަމަޖެހިފައިވާ ބައި އިލެކްޝަނަށް ކުރިމަތިލާން ހުޅުވާލުމުން، މުއްދަތު ހަމަވީ އިރު ކުރިމަތިލާފާއިވަނީ އެންމެ ކެނޑިޑޭޓެއް ކަމަށެވެ. އެހެންކަމުން ށ.ފުނަދޫގެ އަންހެން މެންބަރަށް ޚާއްސަ ގޮނޑިއަށް ކޮންގްރެސް ޕާޓީން ކުރިމަތިލެއްވި ށ. ފުނަދޫ މާބަގީޗާގެ އާމިނަތު ޔުމްނާ ވަނީ އިންތިޚާބު ވެފައިވާކަމަށް އީސީގެ ބަޔާނުގައި ވެއެވެ.

މިފްކޯގެ މީޑިއާ އޮފިޝަލެއް ވިދާޅުވިގޮތުގައި، ގއ. ކޫއްޑޫ މަސް ފެކްޓަރީގައި މަސައްކަތް ކުރަމުންދިޔަ ބިދޭސީން މިދިޔަ ބުރާސްފަތި ދުވަހު ސްކްރީން ކުރުމުން، ތިން ބިދޭސީއަކު ވަނީ ފައިލޭރިއާއަށް ޕޮޒިޓިވް ވެފައެވެ. ފައިލޭރިއާއަށް ޕޮސިޓިވް ވި ތިން މީހުންނަކީވެސް އިންޑިއާއަށް ނިސްބަތްވާ ބިދޭސީންނެވެ. މިހާރު އެ ތިން މީހުންނަށްވެސް ވަނީ ގއ. ވިލިނގިލީގައި ހުންނަ އަތޮޅު ހޮސްޕިޓަލުން ފަރުވާ ދީފައިކަމަށާއި، ތިން މީހުންވެސް ފަރުވާއަށްފަހު މަސައްކަތަށް ނުކުމެފައިވާކަމަށް މިފްކޯގެ އޮފިޝަލް މައުލޫމާތު ދެއްވައެވެ.

މި އަހަރުގެ ތިމާވެށީގެ ދުވަހާ ދިމާކޮށް ފަސް މިލިއަން ގަސް އިންދުމުގެ ޕްރޮގްރާމް ފަށަން ނިންމަވައިފިއެވެ. ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ތިމާވެއްޓާ ބެހޭ ވަޒީރު ޠާރިގް އިބްރާހީމް ވިދާޅުވީ، މި ގަސް އިންދުމުގެ ޕްރޮގްރާމް އަންނަ މަހުގެ ފަސްވަނަ ދުވަހު ފަށާ، މީހުން ދިރިއުޅޭ ހުރިހާ ރަށަކާއި ރިސޯޓުތަކުގައި ވެސް ކުރިއަށް ގެންދާނެ ކަމަށެވެ.

މިއަދު ޠާލިބާނުންގެ މިނިސްޓްރީ އޮފް އިންޓިރިއަރ އެފެއާޒުން ބުނީ، އަފްޣާނިސްތާނުގެ އުތުރުގައި ބޯކޮށް ވާރޭވެހި އުދައެރުމުގެ ސަބަބުން 153 މީހުން މަރުވެފައިވާ ކަމަށެވެ. އަދި ބައެއް ނޫސްތަކުން ރިޕޯޓުކުރާ ގޮތުގައި، ފެން ބޮޑުވުމުގެ ސަބަބުން މިހާ ތަނަށް މަރުވި މީހުންގެ އަދަދު ވަނީ 160 އަށް އިތުރުވެފައެވެ. އަދި 117 މީހުން ވަނީ ޒަޚަމްވެފައިވާކަމަށްވެސް ލޯކަލް އޮފިޝަލުން ވިދާޅުވެއެވެ.

އެމްއެންޑީއެފްއިން ވިދާޅުވިގޮތުގައި ކުޑަކުދިންގެ ދުވަސް ފާހަގަކުރުމަށް މިރޭ 22:00 ގައި ހަވާއަރުވާނެއެވެ. ހަވާ އަރުވަން ހަމަޖެހިފައިވަނީ ކުޑަކުދިންގެ ދުވަހާ ގުޅިގެން ބާއްވާ "އުފާ ފެސްޓިވަލް" ނިންމާލުމުގެ ގޮތުން ހުޅުމާލޭ ސެންޓްރަލް ޕާކްގައެވެ. ސިފްކޯއިން ވިޔަފާރި އުސޫލުން ކުރިއަށްގެންދާ މި ހަރަކާތް ކުރިއަށް ގެންދަން ހަމަޖެހިފައިވަނީ 3 މިނެޓަށް ކަމަށްވެސް އެމްއެންޑިއެފުން ވިދާޅުވިއެވެ.