މިއަދު، ބަނގުރަލާއި މަސްތުވާތަކެތި ގެންގުޅެ ބޭނުންކުރި ކަމުގެ ތުހުމަތުގައި ހައްޔަރުކޮށްފައިވަނީ ހަ ދިވެހިންނެވެ. އެގޮތުން ހައްޔަރު ކޮށްފައިވަނީ ޢުމުރުން 19 އަހަރުގެ މީހަކާއި، 20 އަހަރުގެ ދެ މީހުންނާއި، 23 އަހަރުގެ މީހަކާއި، 25 އަހަރުގެ މީހެއްގެ އިތުރުން 28 އަހަރުގެ މީހެކެވެ. މީގެތެރެއިން 20 އަހަރުގެ އެކަކު ފިޔަވައި ދެން ތިބި އެންމެނަކީ ވެސް މަސްތުވާތަކެތީގެ ރިކޯޑު އޮންނަ މީހުންނެވެ. ހައްޔަރު ކުރި އެންމެންގެ ވެސް ކުޑަކަމުދާ ތަކެތި މަސްތުވާތަކެތީގެ ބާވަތަކަށް ވަނީ ޕޮޒިޓިވް ވެފައެވެ.

އިރުމަތީ ޤުދުސްގައި ހުންނަ އދ. ގެ މައި އޮފީހުގައި އިސްރާއީލުން ރޯކޮށްލުމާ ގުޅިގެން އެ އޮފީސް ވަގުތީ ގޮތުން ބަންދު ކޮށްފިއެވެ. ފަލަސްޠީނުގެ ޤުދުސްގައި ހުންނަ އެ އޮފީހުގެ ވެރިޔާ ފިލިޕް ލަޒާރިނީ ވިދާޅުވިގޮތުގައި، ފާއިތުވި ހަފްތާތަކުގައި ޔަހޫދީން ދިޔައީ އެ އޮފީހަށް އެކި ވަރުގެ ހަމަލާތައް ދެމުންނެވެ. އެގޮތުން އިއްޔެ އެ އޮފީހުގައި ދެ ފަހަރު އަލިފާން ރޯކޮށްލާފައިވާ ކަމަށްވެސް ފިލިޕް ލަޒާރިނީ ވިދާޅުވިއެވެ.

ކުޑަކުދިންގެ ދުވަހުގެ މުނާސަބަތުގައި "އުފާ ފެސްޓިވަލް"ގެ ނަމުގައި ކުޑަކުދީންގެ ހަވީރެއް ބޭއްވުމަށް އިޖްތިމާއީ އަދި އާއިލީ ތަރައްޤީއާއި ބެހޭ ވުޒާރާއިން ނިންމަވައިފިއެވެ. އިޖްތިމާއީ އަދި އާއިލީ ތަރައްގީއާއި ބެހޭ ވުޒާރާއިން އިސްނަގައިގެން ބާއްވާ މި ހަރަކާތަކީ ހައުސިންގ ޑިވޮލޮޕްމެންޓް ކޯޕަރޭޝަން (އެޗް.ޑީ.ސީ) އާއި އުރީދޫއާ ވެސް ގުޅިގެން ބާއްވާ ހަރަކާތެކެވެ. މި މި ޚާއްސަ ހަވީރު ބޭއްވުމަށް ހަމަޖެހިފައިވަނީ މިމަހުގެ 10 އަދި 11 ވަނަ ދުވަހުގައެވެ.

ރާއްޖޭގައި ޤާއިމުވެ ތިބި އިންޑިއާ ސިފައިންގެ ފަހު ބެޗު އަނބުރާ ފޮނުވާލައިފިއެވެ. އިންޑިއާގެ ޚާރިޖީ ވުޒާރާގެ ތަރުޖަމާނާ ހަވާލާދީ އިންޑިއާގެ ނޫސްތަކުން ރިޕޯޓްކޮށްފައިވާ ގޮތުގައި ރާއްޖޭގައި ތިބި ހުރިހާ އިންޑިއާ ސިފައިން އަނބުރާ ގެންދިއުމަށްފަހު މިހާރު ސިފައިންގެ ބަދަލުގައި ޓެކްނިކަލް މަދަނީ މީހުން ވަނީ ގެނެސްފައެވެ.

ހުޅުމާލެއިން ދިރިއުޅުމަށް ދޫކުރާ ބިން ބީލަމުގެ އުސޫލުން ހަމައެކަނި ދިވެހިންނަށް ވިއްކަން މިއަދު ހުޅުވާލައިފިއެވެ. ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހާމަކުރެއްވި ބީލަމުގެ އުސޫލުން ވިއްކަން މިއަދު ހުޅުވާލާފައި ވަނީ ހުޅުމާލޭ 2 ވަނަ ފިޔަވަހީގެ ބީޗް ސައިޑުން 13 ބިމެވެ.

މަގޭ ސޯލާ ޕްރޮގްރާމުގެ ދަށުން ފުރަތަމަ އިންސްޓޯލް ކުރާ ޖުމްލަ 3 މެގަވޮޓްގެ ނިޒާމުތައް ގަތުމުގެ އެއްބަސްވުމުގައި މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވުޒާރާއާއި ޖޭވީ ވިޒްޑަމް ނެގޯއާ ދެމެދު އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވުޒާރާގެ ފަރާތުން ސޮއިކުރެއްވީ ވަޒީރު ޠާރިގް އިބްރާހިމްއެވެ. އަދި ޖޭވީ ވިޒްޑަމް ނެގޯގެ ފަރާތުން އެއްބަސްވުމުގައި ސޮއިކުރެއްވީ އެކުންފުނީގެ ޑިރެކްޓަރ ވަންގް ޓާއޯއެވެ.

ވަޒީރު މޫސާ ޒަމީރު އިންޑިއާއަށް ކުރެއްވި ރަސްމީ ދަތުރުފުޅުގައި އެ ޤައުމުގެ ޚާރިޖީ ވަޒީރު، ޖައިޝަންކަރުއާއި ބައްދަލުކުރައްވާ ވަނީ ރަސްމީ މަޝްވަރާ ތަކެއް ކުރައްވާފައެވެ.

ސަރުކާރުން ހިލޭ، ބޯންމެރޯ ހެދުމަށް ރާއްޖެއިން ބޭރުގައި ތިބި 5 ކުދިންގެ ތެރެއިން 2 ކުދިންގެ އޮޕަރޭޝަން ކާމިޔާބުކަމާއެކު ނިމިފައިވާ ކަމަށް ޞިއްޙަތާބެހޭ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ.

ދިވެހިރާއްޖޭގެ ޤައުމީ އެއާލައިން، މޯލްޑިވިއަންގެ ފްލީޓް ޒަމާނީކޮށް ތަރައްޤީކުރުމަށް ކުރިއަށްގެންދާ މަޝްރޫޢުގެ ދަށުން މުޅިން އާ އޭޓީއާރު 600-42 މަރުކާގެ މަތިންދާބޯޓެއް ގެނެސްފިއެވެ. މޯލްޑިވިއަން އިން މިއަދު، އަލަށް ގެނައި އޭޓީއާރު 600-42 މަރުކާގެ މި މަތިންދާބޯޓަކީ ޒަމާނީ ޓެކްނޮލޮޖީ ހިމެނޭ ވަސީލަތްތަކާއެކު އެންމެ މަތީ ފެންވަރުގެ ހިދުމަތް ފޯރުކޮށްދެވޭނެ ގޮތަށް ފަރުމާކުރެވިފައިވާ އުޅަނދެކެވެ. މިއީ ފްރާންސްގެ އޭޓީއާރު ކުންފުންޏާއެކު މޯލްޑިވިއަން އިން ވެފައިވާ އެއްބަސްވުމުގެ ދަށުން ގަނެގެން ގެންނަ އޭޓީއާރް 600-42 މަރުކާގެ އާ ދެބޯޓުގެ ތެރެއިން އެއް ބޯޓެވެ.

ބ. އޭދަފުށީގައި 1،000 ހައުސިންގް ޔުނިޓް އެޅުމުގެ މަސައްކަތް ޢިމާރާތްކުރުމާއި ބިނާރާ ބެހޭ ވުޒާރާއިން ސިނޯހައިޑްރޯ ކޯޕަރޭޝަން ލިމިޓެޑާ ހަވާލުކުރައްވައިފިއެވެ. ޢިމާރާތްކުރުމާއި ބިނާރާ ބެހޭ ވުޒާރާއިން ހާމަކުރެއްވި ގޮތުގައި މިއަދު އެ ވުޒާރާއާއި ސިނޯހައިޑްރޯ ކޯޕަރޭޝަނުން ވަނީ ފަހުމުނާމާއެއް ސޮއި ކުރައްވާފައެވެ. ޢިމާރާތްކުރުމާއި ބިނާރާ ބެހޭ ވުޒާރާއިން މި ފަހުމު ނާމާގައި ސޮއި ކުރެއްވީ ވަޒީރު ޑރ. އަބްދުﷲ މުއްތަލިބުއެވެ.

މިއަދު އެމް.އެފް.އެމް.ސީ އިން ނެރުއްވި ބަޔާނެއްގައި ވަނީ މިއަދު ކ. ގާފަރު ފަޅުގައި 16 ރަށް ހިއްކައި ރިވެޓްމަންޓް ޖެހުމުގެ ކޮންޓްރެކްޓެއްގައި ރާއްޖޭގެ ކުންފުންޏެއް ކަމުގައިވާ އެޓޯލް ވަރކްސް ޕްރައިވެޓް ލިމިޓެޑް އާއި އެކު ސޮއި ކޮށްފައިފާކަމަށެވެ.

އަމިއްލަ ކުންފުންޏަކުން ރާއްޖެ ގެނެސްފައިވާ ބިދޭސީންގެ ޑިޕޮސިޓްގެ ގޮތުގައި ދައްކާފައިވާ ފައިސާގެ ރިފަންޑްގެ ގޮތުގައި 88،073.90 ރުފިޔާ ދެއްކުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ މައްޗަށް ސިވިލް ކޯޓުން ޙުކުމް ކޮށްފިއެވެ. ގްލޯ ޓުއަރސް ނަމަކަށް ކިޔާ އަމިއްލަ ކުންފުންޏަކުން މިނިސްޓްރީއާ ދެކޮޅަށް ދައުވާކޮށްފައިވަނީ، އެ ކުންފުނިން ރާއްޖެ ގެނެސްފައިފާ ބިދޭސީންގެ ޑިޕޮސިޓްގެ ގޮތުގައި ދައްކާފައިވާ ފައިސާ ރިފަންޑް ކޮށްދިނުމަށްޓަކައި، މިނިސްޓްރީ އޮފް އިކޮނޮމިކް ޑިވެލޮޕްމަންޓްއިން ކޮށްފައިވާ އިއުލާނާއި އެއްގޮތަށް އެ ކުންފުނިން ރުފިޔާގެ ޑިޕޮސިޓް ސްލިޕްތައް ހުށަހެޅުމުން، ރިފަންޑް ފައިސާ ހަވާލުކޮށްފައި ނުވާތީއެވެ.

އިސްލާމިކް މިނިސްޓްރީން މިއަދު ގެޒެޓުގައި ޢާންމުކުރި އިޢުލާނެއްގައި ވަނީ، ޢުމްރާއަށް މީހުން ގެންދިއުމަށް ޝައުޤުވެރިވާ ފަރާތްތަކަށް ޕްރޮޕޯޒަލް ހުށަހެޅުމުގެ ފުރުޞަތު ހުޅުވާލައިފައިވާ ކަމަށެވެ. އިސްލާމިކް މިނިސްޓްރީއިން ވިދާޅުވި ގޮތުގައި ޕްރޮޕޯޒަލްތައް ބަލައިގަތުމަށް ހަމަޖެހިފައިވަނީ އަންނަ އާދިއްތަ ދުވަހުން ފެށިގެން ސަރުކާރު ބަންދު ނޫން ކޮންމެ ދުވަހަކު 9:00 އިން 12:00 އަށް އިސްލާމިކް މިނިސްޓްރީގެ ކައުންޓަރުންނެވެ. އަދި ޕްރޮޕޯޒަލް ހުށަހެޅުމަށް ދީފައިވާ ސުންގަޑިއަކީ މި މޭ މަހުގެ 16 ވަނަ ދުވަހެވެ.

ދިވެހިރާއްޖޭގެ ޚާރިޖީ ވަޒީރު މޫސާ ޒަމީރު ރަސްމީ ދަތުރުފުޅެއްގައި މާދަމާ އިންޑިއާއަށް ވަޑައިގަންނަވާނެކަމުގައި ޚާރިޖީ ވުޒާރާއިން ބުނެފިއެވެ.

ވެލާނާ އިންޓަނޭޝަނަލް އެއަރޕޯޓު (ވީއައިއޭ) ގެ ތެރޭގައި އެއާޕޯޓްގެ މުއައްޒަފުންތަކެއްގެ ގައިގައި ޖަހައި، މާރާމާރީ ހިންގި އެމެރިކާއަށް ނިސްބަތްވާ ފިރިހެނަކު ފުލުހުންގެ ބެލުމުގެ ދަށަށް ގެނެސްފައިވަނީ މިއަަދުގެ ހެނދުނުގެ ވަގުތެއްގައެވެ. އެއަށްފަހު ކޯޓުން މި މީހާ ދޫކޮށްލާފައިވަނީ ގޮތެއް ނިންމުމަށް ކޯޓަށް ހާޒިރުވުމަށް ޝަރުތުކޮށްފައެވެ.

ޗުއްޓީއާ ދިމާކޮށް "ޗުއްޓީ ދިވެހި" ގެ ނަމުގައި ކުޑަކުދިންނަށް ޚާއްސަ ދިވެހި ކިލާސްތަކެއް ބާއްވަން ނިންމަވާފައިވާ ދިވެހިބަހުގެ އެކެޑެމީގެ ކުރީގެ ރައީސް އަޝްރަފް ޢަލީ ވިދާާޅުވެއްޖެއެވެ.

މިއަދު އައިޖީއެމްއެޗުން ނެރުނު ނޫސްބަޔާނެއްގައި ވަނީ، އެ ހޮސްޕިޓަލުގައި ވިހެއި ތުއްތު ކުއްޖަކަށް ފަރުވާ ދިނުމުގައި އެކަށީގެންނުވާ ގޮތްތަކަކަށް އަމަލުކުރިކަމަށް ބުނެ ސޯޝަލްމީޑިއާ އަދި މެއިންސްޓްރީމް މީޑިއާގައި ހަގީގަތާ ޚިލާފައް ދެކެވެމުންދާ ވާހަކައާ ބެހޭގޮތުން އެ ހޮސްޕިޓަލް ހިތާމަކުރާކަމަށެވެ. އައިޖީއެމްއެޗުގެ ބަޔާނުގައި ބުނެފައިވަނީ ބަލިމީހުންނަށް ފަރުވާދިނުމުގައި އެ ހޮސްޕިޓަލުން ޢަމަލުކުރަމުންދަނީ މެޑިކަލް ޕްރެކްޓިސްގައި ޢަމަލުކުރަމުން އަންނަ އުޞޫލުތަކާ އެއްގޮތަށް ކަމަށާއި މީސްމީޑިޔާގައި މީހެއްގެ ބަލި ޙާލަތާމެދު ވާހަކަތަކެއް ފެތުރުނު ނަމަވެސް ބަލިމީހާއާއި ފަރުވާގެ ތަފްޞީލުތަކަކީ ހޮސްޕިޓަލުން ހާމަކުރާނެ މައުލޫމާތުތަކެއް ނޫންކަމަށެވެ.

ދަތުރުފަތުރުކުރުމުގައި އާންމު ރައްޔިތުންނަށާއި ޑްރައިވަރުންނަށް، ލުއިފަސޭހަކޮށްދިނުމަށް "ގޯރައިޑް"ގެ ނަމުގައި މުޅިން އާ އެޕްލިކޭޝަނެއް އިފްތިތާހުކޮށްފިއެވެ. މި އެޕްލިކޭޝަން އިފްތިތާހުކޮށްފައިވަނީ ނިމިދިޔަ ރައްޔިތުންގެ މަޖިލީސް އިންތިޚާބުގައި ލ.ގަން ދާއިރާއަށް ވާދަކުރެއްވި ޕީއެންސީ ކެންޑިޑޭޓް، ޔޫސުފް ނަޝީދު (ޔޫތު) އިންތިޚާބުގައި ވެފައިވާ ވަޢުދު ފުއްދުމުގެ ގޮތުން ބޭއްވި ޚާއްސަ ރަސްމިތްޔާތުގައެވެ. އެޕްލިކޭޝަން އިފްތިތާހު ކޮށްދެއްވީ ޓޫރިޒަމް މިނިސްޓަރު އިބްރާހިމް ފައިޞަލެވެ. ލ. އަތޮޅުގެ އިތުރުން މާލެއާއި، އައްޑުއާއި ފުވައްމުލަކާއި ގދ. ތިނަދޫ އަދި ކުޅުދުއްފުށި ސިޓީގައި ވެސް މިހާރު މި އެޕްލިކޭޝަން ބޭނުންކުރެވޭނެއެވެ.

މިރޭ ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ސްޓޭޓް މިނިސްޓަރ އަލްއުސްތާޛު އަޙްމަދު ޞިއްދީޤު ވިދާޅުވީ، ޤަވާއިދާ ޚިލާފަށް ރާއްޖޭގައި އުޅެމުންދާ ބިދޭސީންގެ ސަބަބުން، ދިވެހިންގެ އިތުރުން އެމީހުންނަށްވެސް ސީރިއަސް މައްސަލަތަކެއް ދިމާވާ ކަމަށެވެ. އެގޮތުން ސިއްޙީ ޚިދުމަތްތައް ފަދަ އަސާސީ ޚިދުމަތްތައް ހޯދުމުގައި ވެސް ޤަވާއިދާ ޚިލާފަށް އުޅޭ ބިދޭސީންނަށް މައްސަލަތަކާ ދިމާވެ، އެ މީހުން ދަނީ  އިތުރަށްވެސް ޤަވާއިދާ ޚިލާފު ކަންކަން ކުރަމުން ކަމަށް ސްޓޭޓް މިނިސްޓަރ ވިދާޅުވިއެވެ.

ސަޢުދީ ޢަރަބިއްޔާގެ އަމީރު ބަދްރު ބިން ޢަބްދުލް މުޙްސިން ބިން ޢަބްދުލްޢަޒީޒް އަލް ސަޢޫދު އަވަހާރަވުމާގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ. ރައީސުލްޖުމްހޫރިއްޔާގެ އޮފީހުން މިއަދު ހާމަކުރެއްވި ގޮތުގައި، ރައީސް ޑރ.މުޢިއްޒު ވަނީ ސަޢުދީ ޢަރަބިއްޔާގެ ރަސްގެފާނާއި ވަލީޢަހުދުއަށް ވަކިވަކިން ތަޢުޒިޔާގެ މެސެޖުތަކެއް ފޮނުއްވާފައެވެ. އަދި މި މެސެޖުތަކުގައި ރައީސް ޑރ.މުޢިއްޒު ވިދާޅުވެފައިވަނީ، އަމީރު ބަދްރު ބިން ޢަބްދުލް މުޙްސިން ބިން ޢަބްދުލްޢަޒީޒް އަލް ސަޢޫދު އަވަހާރަވި ޚަބަރު އެއްސެވީ ފުން ހިތާމަޔާ އެކު ކަމަށެވެ.

ކުޅިވަރާއި ހަށިހެޔޮކަމާ ބެހޭ ވުޒާރާއިން ވިދާޅުވީ މިއަދު ވަޒީރު އަބްދުﷲ ރާފިއު، ފަރަންސެސިވިލާތުގެ ސަފީރު، ޖީން ފްރެންކޯޒް ޕެކްޓެޓާ ބައްދަލުކުރައްވާ، ކުޅިވަރާއި އެތުލީޓުން ތަރައްޤީ ކުރުމަށް ސަރުކާރުން އެކުލަވާލާފައިވާ ދިގު މުއްދަތުގެ ޕްލޭން ހިއްސާކުރައްވާފައެވެ.

ވެމްކޯއިން މިއަދު އެކސްގައި ކުރި ޕޯސްޓެއްގައި ބުނެފައިވަނީ މާލޭ އިންޑަސްޓރިއަލް ވިލެޖު ސާފުކުރުމުގެ މަސައްކަތް ބާރު ދުވެއްޔެއްގައި ކުރިއަށް ދާ ކަމަށެވެ. އަދި ސާފުކުރުމުގެ ތެރެއިން މިހާތަނަށް 928 ޓަނުގެ ކުނިނަގާފައިވާކަމަށްވެސް ވެމްކޯގެ ޕޯސްޓުގައި ވެއެވެ. މީގެ އިތުރުން، އިންޑަސްޓްރިއަލް ވިލެޖު ސާފު ކުރުމުގެ މަސައްކަތް އަދިވެސް ކުރިއަށް ދާކަން ހާމަކުރައްވާ، މިހާތަނަށް ސާފުކުރެވުނު ސަރަހައްދުގެ ވީޑިއޯއެއް ވެމްކޯއިން ވަނީ ޢާންމުކޮށްފައެވެ.

މެޓް އޮފީހުން މިއަދު ނެރުނު ބަޔާނުގައި ބުނެފައިވަނީ މި އަހަރުގެ ޖޫން, ޖުލައި, އޮގަސްޓް އަދި ސެޕްޓެމްބަރު މަހު އުތުރާއި މެދުރާއްޖެތެރޭގެ ސަރަހައްދުތަކަށް ޢާންމުކޮށް ވާރޭވެހޭ މިންވަރަށް ވުރެ އިތުރަށް ވާރޭވެހޭނެ ކަމަށް ލަފާ ކުރެވޭ ކަމަށެވެ. އަދި ރާއްޖޭގެ ދެކުނަށް އެ ހަތަރު މަހު، ވާރޭވެހޭނީ ޢާންމުކޮށް ވެހޭ މިންވަރަށްވުރެ މަދުން ކަމަށް ވެސް މެޓުން ބުނެފައިވެއެވެ.

ހަމަހަމަކަމާ އެކު ކޮންމެ ރައްޔިތަކަށްވެސް ރައީސުލްޖުމްރޫހިއްޔާއާ ސުވާލުކުރެވޭނެ ނިޒާމެއް ޤާއިމްކުރަން ނިންމަވާފައިވާކަމަށް  ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސްޕާސަން ހީނާ ވަލީދު ވިދާޅުވެއްޖެއެވެ.

ތިން ޤައުމަކަށް ކަނޑައެޅި ސަފީރުންނަށް މަޖިލީހުން ރުހުން ދީފިއެވެ. އެގޮތުން ރައްޔިތުންގެ މަޖިލީހުގެ މިއަދުގެ ޖަލްސާގައި ރުހުން ދޭން ފާސްކޮށްފައިވަނީ ޗައިނާގައި ހުންނަވާ ރާއްޖޭގެ ސަފީރަށާއި، ބަންގްލަދޭޝްގައި ހުންނަ ދިވެހިރާއްޖޭގެ ސަފީރުގެ އިތުރުން ސަޢުދޫ ޢަރަބިއްޔާގައި ހުންނަވާ ރާއްޖޭގެ ސަފީރަށެވެ.

ފަލަސްތީނުގެ ޚަބަރުތައް ގެނެސްދިނުމުގައި އެންމެ މުހިންމު ދަޢުރެއް އަދާކުރަމުންދާ މީޑިޔާ ޗެނަލް އަލްޖަޒީރާ، އިޒްރޭލުގައި ދެއްކުން މަނާކުރުމަށް އެޤައުމުގެ ބޮޑުވަޒީރު ބެންޖަމިން ނަަތަންޔާހޫގެ ކެބިނެޓުން ފާސްކޮށްފި އެވެ. މިއަދު އަލްޖަޒިރާގެ އޮޕެރޭޝަންތައް އިސްރާއީލުގައި ހިންގުން ވަގުތީ ގޮތުން ބަންދުކުރަން ފާސްކޮށްފައިވަނީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ކެބިނެޓްގެ ހުރިހާ ވަޒީރުންގެ އިއްތިފާގުންނެވެ.

މި އަހަރުގެ ކުދަކުދިންގެ ދުވަސް ފާހަގަ ކުރުމަށް، ކުޑަކުދިން އިންޖިނިއަރިން ދާއިރާއަށް ޝައުގުވެރިކުރުމަށް ޚާއްސަ ހަރަކާތެއް ބާއްވަން ސްޓޭޓް އިލެކްޓްރިކް ކޮމްޕެނީ ލިމިޓެޑް، (ސްޓެލްކޯ) އިން ނިންމައިފިއެވެ. ސްޓެލްކޯއިން ކުރި ޕޯސްޓެއްގައި ބުނެފައިވަނީ، ކުޑަކުދިންގެ ދުވަހުގެ ގޮތުގައި ފާހަގަކުރާ، މޭ މަހުގެ 10 ވަނަ ދުވަހު، ކުޑަކުދިން އިންޖިނިއަރިން ދާއިރާއަށް ޝައުގުވެރިކުރުވުމަށްޓަކައި، ތަފާތު މާހައުލަކުން ތަފާތު ތަޖުރިބާއެއް ކުރުމުގެ ފުރުސަތާއެކު، ޚާއްސަ ހަރަކާތެއް އެ ކުންފުނީގެ ހެޑް އޮފީހުގައި ބޭއްވުމަށް ހަމަ ޖެހިފައިވާ ކަމަށެވެ.

ދިވެހިބަހާއި ސަޤާފަތާއި ތަރިކައާ ބެހޭ ވުޒާރާއިން ކުރިއަށް ގެންދާ ދިވެހި ޤައުމިއްޔަތު އިޢާދަކުރުމުގެ މަޝްރޫޢުގެ ފުރަތަމަ ޕައިލޮޓް ޕްރޮގްރާމް، "އަޖުމަފިޔަވަހި" ދިވެހިރާއްޖޭގެ ޤައުމީ ދިފާޢީ ބާރާ އެކު ކުރިއަށް ގެންދިޔުމަށް މަޝްވަރާކުރައްވައިފިއެވެ. މި މަޝްވަރާ ބައްދަލުވުމުގައި ދިވެހި ބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހިމް ވަނީ ދިވެހި ޤައުމިއްޔަތު އިޢާދަ ކުރުމުގެ ޕްރޮގްރާމް އެންމެ ފުރަތަމަ ހިންގާ މުއައްސަސާއަކީ ޤައުމީ ދިފާޢީ ބާރުކަން ފާހަގަކުރައްވާ ޤައުމިއްޔަތު މަޝްރޫޢުގައި އެ މުއައްސަސާގެ މުހިންމުކަން ފާހަގަކުރައްވާފައެވެ.

މިއަދު މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހާމަކުރެއްވި ގޮތުގައި އެމެރިކާ ސިފައިންނާ ގުޅިގެން ބާއްވާ އެކްސަސައިޒް، ބްލެކް މަރލިން، ފެށުމުގެ ގޮތުން ބަންޑާރަކޮށީގައި ވަނީ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީގެ އިތުރުން ޔޫއެސް މޮންޓާނާ ނޭޝަނަލް ގާޑުގެ އެޖުޓަންޓް ޖެނެރަލް، މޭޖަރ ޖެނެރަލް ޕީޓަރ ރޮނެކްވެސް ވަނީ ބައިވެރިވެލައްވާ ރިމާކްސް ހުށަހަޅުއްވައި ދެއްވާފައެވެ.

މޯލްޑިވިއަން އިން ހާމަ ކުރެއްވި ގޮތުގައި އިންޑިޔާގެ ޓްރިވެންޑްރަމްއާއި ކޮޗިންއަށް މި މޭ މަހު ތިން ދަތުރު އިތުރު ކުރުމަށް ވަނީ ނިންމާފައެވެ. އެގޮތުން މޯލްޑިވިއަންއިން ޓްރެވިންޑްރަމް އަށް ފްލައިޓުތައް އިތުރުކޮށްފައި ވަނީ މޭއި 06، 10، އަދި 20 ގަައި ދަތުރުތައް ކުރާގޮތަށެވެ. އަދި ކޮޗިނަށް ދަތުރުތައް އިތުރުކޮށްފައި ވަނީ މޭއި 08، 17، 21 ގައި ދަތުރު ކުރުމަށެވެ. މީގެ އިތުރުން އަންނަ ޖޫން މަހު 19 ގައި ދަތުރުކުރުމަށްވެސް މޯލްޑިވިއަންއިން ވަނީ ދަތުރެއް އިތުރުކޮށްފައެވެ